زوجك (مش) هو مصدر الحب

مش كل حاجة مسئوولية الزوج. لو اتجوزتي علشان يبقي هو كل حاجة في حياتك بمعني الكلمة فاسمحي لي اقولك: انتي غلطانة.

زوجك هو مصدرك للحب -أكيد-. بس مش هو المصدر الوحيد للحب. الحب أنواع كثيرة جدا. من أمثله أنواع الحب هو حب الأصدقاء، أو الأهل، أو الأطفال. الحب حتي مش بس أشخاص. الحب ممكن يبقي رياضة أو هواية أو نوع عمل معين.

لازم تحافظي علي علاقتك مع أصدقائك لأنهم بيدوكي الحب بس من منظور مختلف. مش من الطبيعي ان زوجك يستطيع أن يحل مكانهم. اذا كان بيعمل كدة، قدريه جدا. ولو كان مش بيديكي النوع ده من الحب، هو في الأصل مش مطلوب منه ده. أهلك وعائلتك برده بيوفروا لك حب من نوع ثالث. من قلة العقل هجرك لهم علي أمل ان زوجك هيعوضك هذا النوع من الحب.

اذا كان عندك منابع اخري للحب حافظي عليها. كل منبع ليه صفاته، احتياجاته، ومميزاته. لو طالبتي زوجك بسد احتياجاتك المختلفة لكل انواع الحب تبقي غلطانة. تبقي تقلتي عليه. وأكيد مهما حاول، صعب يديكي كل أنواع الحب بالمقدار اللي محتاجاه. مهما حاول مستحيل يحبك زي باباكي ومامتك. وهيفضل هو ييحاول انه يسد الفراغ ده، وانت هتفضلي علي طول عطشانة لحبهم ومش مكفيكي اللي بيعمله. المشكلة انه مع الوقت هيلاقي مفيش منك استجابه ولا تقدير. والطبيعي انه هيبطل يحاول يعوضك عن منابع الحب اللي انت قررتي تهجريها وطالبتيه انه يخلق لك منابع جديدة. و بتبدأي تحسي بأكتر جملة مشهورة بين الازواج: “مش بيحبني زي الاول”!

في الحقيقة هو حبه ماقلش ولا حاجة. لكنه مع الوقت اتعلِّم يوجه مجهوده في الحب للمنابع اللي انت فعلاً شايفاها وحاسة بيها. علي سبيل القياس، انت هتحاولي تتعلمي الطبيخ. ومع الوقت الأصناف اللي مش هتظبط بعد سنين محاولة هتبطلي تعمليها حتي لو هو بيحب النوع ده من الاكل. طبعا هتحاولي قدر المستطاع ولو مفيش فايدة, هتبطلي النوع ده بكل تلقائية. ولو هو اعتبر توقفك عن المحاولة قلة حب، يبقي غلطان.

نفس الكلام بالنسبة للحاجات اللي بتحبي تعمليها. ازاي تبطلي الرياضة اللي بتحبيها على أمل إن الفرجة على التليفزيون معاه هتديكي نفس احتياجك للطاقة الإيجابية اللي جاية من الرياضة. انتي حسبتيها غلط من الاول. ازاي تتوقعي إن حبك هيعوض احتياجه لإثبات نفسه في شغله. ده منبع للحب مختلف عن ده. والأهم إن الاتنين لا يتعارضوا مع بعد. بالعكس، هما بيكملوا بعض فوق ما تتصوري.

كل واحد فينا لازم يفهم حدود اللي قدّامه وحدوده هو كمان. علشان يقدر يحافظ علي سعادته ومنها يقدر يحافظ علي منابع الحب الموجودة من شريك الحياة. والأهم، اننا نحافظ علي مصادر الحب من الأشخاص اللي خارج نطاق الزواج. مش معني انك اتجوزتي انك انقطعت عن العالم. كل حاجة بالعقل والتفاهم. لكن المهم انك تبقي عارفة إن مش كل حاجة في الدنيا مفروض زوجك اللي يعملها!

Abeer Ghander

Abeer Ghander

Abeer is a deep thinker, a quiet person… fragile yet hyperactive! She’s a married working mother who recently moved to a new country. She likes to consider herself living in multiple worlds at the same time. She lives on the extremes. Abeer is also a former hurdler who won gold medals for years. She loves writing and driving. You can read more of her articles here: http://ghandar.wordpress.com