تخاريف واحدة خَسِت

كتير منا لما بنخس (خصوصا لو وزن كبير) بنحس بفرق للاحسن. صحة احسن، حركة احسن، ثقة بالنفس. فرصة جديدة لتجربة حياة مختلفة (لو كان الشخص زي حالاتي كده طول عمره كان وزنه زايد). و ممكن نعد المميزات دي الى ما لا نهاية.

انا واحدة من اللي قدروا يخسوا و يغيروا من حياتهم. بس بقى حبيت ألقي الضوء على المميزات اللي بفتقدها دلوقتي لما خسرت جزء كبير من وزني -الحمدلله-.

 ١- قوة: مش هولاكو يعني، بس زمان، والله كنت بزق العربية عادي لوحدي. اكن الوزن الزيادة ده كان بيدي رسوخ كده و ثبات.

٢- الثقة: الدنيا كانت حلوة ولا حد بيغير ولا نظرات مالهاش لازمة ولا حاجة. كانت الحياة احلى و ابسط. انا نفس الشخص بأفكاره بس اللي فارق الشكل. يعني مش حخطف جوزك على فكرة!

٣- الكيلو ماكنش بيفرق: كنت بتخن بالخمسة كيلو عادي، ولا حد بيلاحظ. و أصلا مافيش فرق في الهدوم عشان أصلا هي كده كده واسعة. دلوقتي النص كيلو بيعملي مناحة في مخي و لبسي.

٤- راحة: لما مثلا كنت بسند على حاجة، ماكنتش بحس الشيء ده غارز في عظامي. دلوقتي لازم يبقى فيه عازل علشان غير كده ألآم مُبرحة.

٥- حرية: يعني كنت باكل اي حاجة في اي وقت مابحسبهاش. فتة شاورما الساعة ٦ الصبح، او اعمل اوردر بيتزا. كله متاح، حدودي السما. دلوقتي اقل حاجة تجيبلي انتفاخ و تلبك معوي.

٦- الهوس: ماكنتش ببص في المرايا بعد ما اكل اكلة و لا كنت باوزن نفسي كل يوم اشوف تخنت ولا لأ مثلا.

٧- الوقت: الوقت المستغرق في اني اجهز كان لا يتعدى ١٠ دقائق. دلوقتي بقى، لو فيه حاجة شكلها متخني نص سنتي، يلا نغير اللبس كله. و عيش بقى في الوقت الضايع.

٨- راحة البال: ماكنتش perfectionist كده. يعني كان عادي لو كَروِّت في المذاكرة او نازلة مش لابسة احسن حاجة. دلوقتي الperfectionism حيجنني. اصل لما حاجة مهمة كده زي الشكل تتغير، بتاخد معها package حلوة كبيرة تانية.

٩- نظرتي لنفسي: زمان كنت حتة واحدة كدة على بعدي فمكانش عندي مشاكل خالص. دلوقتي بقيت اركز اوي مع كل حاجة في جسمي

كل ده طبعا مش مبرر ان اي حد يكون عنده وزن زايد لأَنِّي انا دلوقتي اسعد و مقتنعة بنفسي اكتر
Heba Abdallah

Heba Abdallah

Heba is a mass communication graduate who decided to drastically shift her career after studying Nutrition. She believes that nutrition is the center of our psychological and physical wellbeing. She tries to change lives and see through souls, and what is beyond the person. She seeks to learn and understand, and finds joy in listening to and helping others. She believes in people and their power to change and grow.